Memoria de muller é un proxecto da Rede de dinamización a través do cal se pretende o achegamento de mulleres maiores de 50 anos ás tecnoloxías da información e comunicación. Preto de 100 mulleres de toda Galicia achégannos os seus recordos a través dun vídeo feito por elas mesmas, podendo así recordar a nosa memoria máis recente a través de cada unha das súas historias. Cada unha delas escribiu a súa historia, recolleu fotografías para documentala, gravou a súa voz, escolleu a música para ambientala e xuntou todo, conseguindo cada un dos vídeos que podedes atopar na web.

Para ver cada un dos vídeos só tedes que visitar a web www.memoriademuller.eu, e alí navegar por cada unha das poblacións nas que se desenvolveu a iniciativa e mirar os seus vídeos. Eu (Víctor) tiven a sorte de colaborar nos vídeos que fixeron en San Sadurniño, e a modo de exemplo, póño aquí debaixo os vídeos que alí fixemos:

• Os anos da guerra, por María Romero Castrillón.
• Rebuscando nun baúl, por Consuelo Picos Picos.
• Recordos dunha nena, por Eva Blanco García.
• O mellor agasallo da avoa, por Fina Casal Sanesteban.
• Así se fixo, onde se pode ver como foi o proceso no que se fixeron os vídeos.

Espero que vos gusten!

Agora mesmo, en Sada estamos a facer algo moi parecico a este proxecto, que se chama Memoria dos oficios, no que 7 veciños de Sada recordan a través dun vídeo un oficio tradicional, próximamente presentarémosvos os vídeos.

Cantos bos recordos me trae volver a ver ese vídeo, que con esta, xa o debín ver máis de 10 veces. E a verdade é que foi un gran pracer compartir todas esas historias con esas fantásticas mulleres. Un biquiño para cada unha delas, por se o ledes.

Por certo, agora unha delas ata ten un blog, o seu enderezo é benchevale.blogspot.com, anímovos a que lle botedes unha ollada, que está realmente ben.

O pasado domingo, 12 de outubro, emitiuse no programa A Revista fin de semana da TVG a reportaxe que podedes ver no vídeo de arriba (tamén se pode ver na web da TVG). Memoria de muller é un proxecto da Rede de Dinamización que pretende achegar ás mulleres ás novas tecnoloxías ao mesmo tempo que recuperan a memoria histórica, social, persoal ou cultural do seu concello. Cada unha destas mulleres é a protagonista do seu propio vídeo no que a través de unha historia escrita por elas mesmas, imaxes seleccionadas e escaneadas por elas mesmas, a posterior narración da historia feita por elas mesmas e finalmente, a edición dun vídeo con todo isto feito tamén por elas mesmas. Notaredes que remarquei especialmente o feito por elas mesmas, porque, no fondo, eso é o máis importante deste proxecto, elas mesmas.

O proxecto estase a realizar en multitude de Concellos galegos nos que ten presencia a Rede de Dinamización, e entre eles Chantada, que é o do vídeo que nos ocupa. Os vídeos finais aínda non están dispoñibles na rede, aínda que moitos deles xa están rematados. Non están na rede porque se está a crear unha web propia na que queden recollidos todos os vídeos que xa vos contarei no seu momento.

Persoalmente, eu tamén tiven a sorte de participar xunto con Ana na creación dun destes vídeos no concello de San Sadurniño, e foi unha das experiencias máis gratificantes e enriquecedoras que levei a cabo como dinamizador. O trato diario coas catro protagonistas foi algo excepcional. Día a día xurdiron anécdotas que acabaron en amizade e nun intercambio de correos e mensaxería instantánea xa que tiven que ir a dinamizar a outro concello. Porque a labor de dinamización non debe quedarse só nun traspaso de coñecementos alumno-profesor.